BDK 3013 : KOBOLINGKAANGAN KOMUNIKASI

KOBOLINGKAANGAN KOMUNIKASI
 BDK : KEMAHIRAN KOMUNIKASI BAHASA KADAZANDUSUN
( JESSY GINUS )

Kobolingkaangan nopo nga kirati do kosusaan toi’ ko konflik i adadi montok iso-iso ahal om kobolingkaangan nopo diti nga mositi do salasayon. Kobolingkaangan nopo diti nga milo adadi do hinongo nopo om au minting do timpu toi ko kinoyonon.  Ogumu ahal di kopogowit do kobolingkaangan tumanud do kouyuyuo id timpu diri. Ogumu kawo do kobolingkaangan id koposion dotokou, miagal ko kobolingkaangan miampai paganakan, id balajalan, pongindopuan om susuai po kawagu. Boros ‘komunikasi’ nopo kawagu nga milo rotion sabaagi pibarasan id pialatan do duo toi ko pipiro o tulun hinongo do maya komunikasi diti, adadi o proses papabaagi maklumat/toilaan kumaa tiso om tiso. Tumanud di Aristotel id suang do buuk Retorica di sinupu dau, komunikasi nopo nga kirati do nunu nopo boroson di minoboros kumaa di mokinongou. Komunikasi nogi diti nga mogowit rati do isai nopo ii mimboros kumaa di ponongkibarasan miampai momoguno do nunu nopo saluran montok popolombus di boroson dau. Komunikasi nopo diti nga amu milo adadi nung aiso no i moboros om mokinongou toi ko i manahak maklumat om mamaramit do maklumt. Komunikasi nopo diti nga milo do adadi do id iso kinoyonon soira kopogiruruba o duo toi ko pipiro tulun om milo nogi do adadi maya media sosial miagal do Google meet, Whatapps, Facebook om susuai po. Suai ko mantad dilo, milo nogi o komunikasi diti do adadi maya do lambang-lambang om isyarat do tinan miagal do mangapoi, tumuku om susuai po. Dadi, milo tokou rotion o kobolingkaangan komunikasi sabaagi konflik i adadi soira haro pisuaian pendapat, kopomorotian toi ko haro i amu kopisudong id pibarasan. Konflik komunikasi nopo diti nga milo adadi id tionon pakalajaan, id suang organisasi, id pialatan tangatambalut, paganakan om kinoyonon umum. Ogumu ii kopogowit do kobolingkaangan id komunikasi. Komoyon nopo nga, okon nopo ko maya do boros nga milo nogi maya do isyarat tinan om kowowoyoo posorili. Dadi baino nopo nga iloon tokou piipiro ahal di kopogowit kumaa kobolingkaangan komunikasi om ingkuro do monolibamban kobolingkaangan do komunikasi.

Haro pipiro ahal di kopogowit do kobolingkaangan do id komunikasi. I kumoiso nopo nga, pisuaian latar koubasanan toi ko budaya. Koubasanan nopo nga milo rotion sabaagi do kararalalano koposion do iso tinimungan do tulin i poingion id iso kinoyonon. Pisuaian latar koubasanan nopo nga kirati do poinsusuai o boros, kopoposion om koubasanan id adadi sabap no do mogisusuai o tinaru, bansa om kotumbayaan. Toinsanan tinaru haro o koubasanan diolo sondiri miagal do kopomogunaan boros sandad i poinsusuai mantad tinaru do suai. Sabaagi do poomitanan, tinaru Kadazaandusun momoguno boros Kadazan toi ko Dusun sabaagi boros sangangadau om tinaru Malayu momoguno boros Malayu , tinaru Sina nopo nga momoguno bros do Sina om tinaru suai nga momoguno nogi boros do tinaru diolo sondiri.  Sundung pia do mogisusuai boros di gunoon, toinsanan tinaru mositi do mamaamasi toi ko mion id iso kinoyonon lolobi po kopio id Pogun do Malaysia diti tu ogumu kawo do tinaru om koubasanan. Kobolingkaangan komunikasi insaru adadi adadi id  pialatan tulun puun Kadazandusun. Komoyon nopo nga pirotian do boros au kopiagal id pialatan tulun puun Kadazandusun toi ko’  id paganakan Dusun, Paitan  om Murut. Haro i’ akawas pirotian do boros om haro i’ osuatan om osiriba toi ko oluhoi. Kinoyonon do tulun Kadazandusun di misuai miampai nga nantaban do kowoyo-woyoon geografi miagal ko’ nuluhon, bawang, kotolunan om suusuai po kaanu manahak do kobolingkaangan pirotian boros.

Sabab kumoduo nopo di kopogowit do kobolingkaangan id komunikasi nga  pisuaian tua pomusarahan. Pisuaian tua pomusarahan kirati do haro komi di poinsusuai mantad tulun do suai. Koinsoruan nopo nga adadi pisuaian tua pomusarahan diti soira haro pogibabarasan miampai do tangatambalut, paganakan, toi ko miampai do isai nopo. Soira do mogisusuai tua do pomusarahan, haro i amu kotorimo komi do tulun suai loolobi po kopio nung komi nopo diri nga osodu pisuaian mantad do idia diolo.  Sabaagi do poomitanan, soira haro pitimbungakan do paganakan montok mogiba-baagi do tana. Id pitimbungakan diri, tantu no do haro i amu kotorimo kagaaban om komi do paganakan dii suai tu mumang gia kagaaban dau no i kinongohon. Id timpu di miondot, iti nogi nga milo nogi kopogowit kumaa pioduhan.

Suai ko mantad dilo, koboboroso di kosinduol do ginawo nogi nga milo nogi kopogowit do kobolingkaangan id komunikasi. Koboboroso di kosinduol do ginawo nopo nga kirati do kopomogunaan boros di tayamut om orongit i kaanu do poporuol ginawo tulun suai soira do korongou yolo do boros diri. Kosoruan nopo diti nga adadai id pialatan do sukod wagu i orohian mongkoringau miampai momoguno boros di amu osonong karangahan. Sabaagi poomitanan, kopomogunaan boros miagal ko ‘budu’ toi ko ‘sial’ om kopomogunaan boros tangayamut montok mongkoringau miampai tongotambalut. Maya do ahal diti, iti no ngawi i kopogowit kumaa kobolingkaangan id komunikasi tu okon gia ko toinsanan tulun orohian korongou boros di amu ongosonong. Id timpu do miondot, iti nogi ngawi nga milo kopogowit kumaa pioduhan. Dadi maya do poomitanan dilo, kaanu iti popokito do kopomogunaan boros di tangayamut om tongorongit nopo nga salah iso sabab di kopogowit do kobolingkaangan id komunikasi.

Pisuaian do dimpoton do id tinimungan toi ko tososongulun nogi nga milo ngoi kopogowit do kobolingkaangan id komunikasi. Pisuaian do dimpoton nopo nga kirati do mogisusuai kagaaban do sosongulun toi ko tinimungan (Ponco Dewi,2018). Pisuaian kagaaban diti milo kopogowit kobolingkaangan do komunikasi tu milo managak pirotian id pialatan do tulun di kaampai. Kosoruan nopo diti nga adadi soira haro kalaja do id tinimungan. Sabaagi do poomitanan, id pialatan tangayanak sikul takawas i noonuan lungkitas diolo do kalaja id tinimungan. Soira nopo haro pogibabarasan, haro timpu do okon toinsanan sompuruan di tinimungan diri kotorimo do tua pomusarahan tulun suai tu haro gia kagaaban diolo sondiri. Dadi iti no ngawi i kopogowit do kobolingkaangan id komunikasi tu mogisusuai tua pomusarahan om kagaamaban dii maan dimpoto do tiso-iso toi ko tinimungan.

Sumusuhut, kapatahakan do maklumat di au orotian nga kopogowit nogi kobolingkaangan do id komunikasi. Kapatahakan maklumt di au orotian nopo nga milo rotion sabaagi maklumat di pinatahak koborulong do tulun di mokinongou. Ahal nopo diti nga kosoruan adadi maya kopomogunaan media massa sabaagi do kawo mikomunikasi. Sabaagi do poomitanan, kapataakan maklumat maya aplikasi Whatsapp it amu osukup om mogiputut-putut. Dadi maya do ahal diti, iti no ngawi i koborulong do tulun dii minonorimo do maklumat diri. Poomitanan suai nopo nga maya kopomogunaan ponginibaan ijaan miagal do ‘nosiap’ ijaon sabaagi ‘nsiap’ om ‘opoto’ ijaon sabaagi do ‘opto’. Dadi maya kopomogunaan ponginibaan ijaan diti, iti no i kopogowit do kobolingkaangan id komunikasi lolobi po kawagu id pialatan do komolohingan. Id timpu di minondot, kopomogunaan boros tinaru do suai kumaa tulun di au karati do boros diri nogi nga kopogowit nogi kobolingkaangan do id komunikasi. Sabaagi do poomitanan, tangayanak momoguno boros Malayu toi ko boros Ingilis kumaa molohing dilo di aiso torotian doid boros diti. Dadi ahal diti kopogowit do kobolingkaangan id komunikasi tu maklumat nopo gia di pinatahak nga amu orotian.

Sabab kotohuri di kopogowit do kobolingkaangan komunikasi nopo nga aiso kabaalan do moboros soira id dumbangan do ginumuan. Komoyon nopo diti nga amu koilo toi ko aiso idea soira moboros id dumbangan tulun di ogumu tu amu gia katama. Kosoruan nopo nga ahal diti adadi id pialatan do tanak sikul. Sabaagi do poomitanan, soira suhuon do mongingia ii tangayanak montok papabata id dumbangan do kalas, haro piipiro tulun tangayanak di aiso kabaalan do mooboro id dumbangan do ginumuan tu amu gia oubas (Ponco Dewi,2018). Suai ko mantad diri, iti nga asaru nogi adadi soira mogihum do pakalajaan id iso - iso gana pongindopuan . Soira kikobollingkaangan id komunikasi tu aiso kabaalan do moboros id dumbangan boyoon di maganu pakalaja, iti no ii kopogowit do sosongulun ii mogihum do pakalajaan amu otorimo do kumalaja id gana pongindopuan diri. Dadi maya do poomitanan diti, kaanu iti do popokito do asio kabaalan do moboros soira id dumbangan tulun suai toi ko ginumuan nogi nga milo kopogowit do kobolingkaangan id komunikasi.

Koinsanai masalah nopo nga haro ralan di milo do onuon montok no do monolibamban do masalah diri. Dadi laang kumoiso npo montok monolibamban kobolingkaangan id komunikasi nga, mositi miiso ginawo monolibamban ahal di toguangon. Soira nopo do haro kobolingkaangan di notoguang do iso-iso tinimungan, mositi no do miiso ginawo monolibamban do kobolingkaangan diri. Koinsanai tulun dii poingampai doid iso-iso organisasi dii, mositi manahk tua pomusarahan om monokodung do mogihum ralan montok monolibamban do kobolingkaangan dii nabantalan. Maya do laang diti, kaanu iti manalasai do kobolingkaangan di notoguang om kaanu nogi magalai mantad pioduhan ii milo kopogowit kumaa kobolingkaangan id komunikasi. Dadii, soira haro kobolingkaangan, toinsanan tulun mositi maganu boogian montok monolibamban do kobolingkaangan diri mooi do au adadi kobolingkaangan id komunikasi (Sititi Roskina,2020).

Laang kumoduo nopo do monolibamban kobolingkaangan id komunikasi nga mositi do muhot soira haro i amu orotian. Komoyon nopo diti nga soira nopo do amu tokou karati, mositi do muhot tokou kumaa tulun di tangabaal. Id timpu do miondot, oponsol nogi do soriukon tokou po iso-iso ahal toi ko kapatahakan maklumat di popoborulong mooi do kotorimo tokou maklumat di otopot. Sabaagi poomitanan, nung amu tokou nopo karati do nunu ii pinaajal do mongingia id dumbangan, mositi tokou do muhot kumaa mongingia diri mooi do karati om amu tokou oborulong. Suai ko mantad diri, nung kotorimo tokou nopo maklumat maya media massa miagal aplikasi do Whatsapp ii amu orotian, oponsol do muhot tokou kawagu kumaa do tulun di pinapatahak do maklumat diri. Dadi maya do laang diti, kaanu nogi iti monolibamban kobolingkaangan do komunikasi.

Sumusuhut, mositi monorimo kinoutuson tumanud di pinogibabarasan. Soira nopo haro pitimbungakan montok manalasai do iso-iso ahal, mositi tokou monorimo do kinoutuson dii tumanud pinogibaabarasan om kinokunan toinsanan tulun dii nakaampai.. Montok do ahal do miagal diti, nung kakal tokou po amu kotorimo kinoutuson mantad dii ginumuan, milo tokou popolombus suang ginavo dotokou miampai momoguno boros om woyo dii olinuud. Sabaagi poomitabnan, soira nopo haro pitimbungakan di manahak koobian kumaa dotokou montok mogihum ralan do papatantu do kinoutuson, mositi tokou no do momusorou taralaom-ralom miampai mintong do kounalan om koluhuyan montok do koutuson dii tahakon tokou. Oponsol kopio do kipomusarahanh om kopuriman tokou do tirad dii tu kaanu iti do manahak koobian di amu kopongunsub tulun suai do mogiodu. Dadi, maya do laang diti, kaanu tokou monolibamban mantad adadi o pioduhan maya boros ii kopogowit do kobolingkaangan doid komunikasi id pialatan do tulun toi ko tinimungan di minogititimbungak.

Suai ko mantad diri, kopomogunaan boros di orotian om amu kosinduol do ginawo nogi nga iso ralan montok monolibamban diti kobolingkaangan id komunikasi. Soira nopo do monongkiboross tokou kumaa do tulun suai, mositi tokou no momoguno boros di olinuud om orotian do tulun di ponongkibarasan. Maya do laang diti, kaanu iti mongolig mantad adadi kobolingkaangan do id komunikasi. Sabaagi do poomitanan, soira tokou nopo monongkiboros kumaa do tulun suai, oponsol kopio do momusoou tokou po do taralaom-ralom pogulu i do mooboros mooi do nunu boros di kalabus mantad munung dotokou amu koponinduol ginawo do wokon. Suai ko mantad diri, oponsol nogi do momoguno tokou kawo boros di orotian do tulun di ponongkibarasan mooi do maklumat di pinatahak amu koborulong do tulun diri. Id timpu di miondot, mositi tokou nogi kitopurimanan soira do mongkoringau mooi do amu adalaan gisom i do koponinduol ginawo do tulun suai. Dadi maya do laang diti, tantu do kaanu do monolibamban mongolig mantad adadai iti kobolingkaangan id komunikasi.

Laang kotohuri montok monolibamban kobolingkaangan id suang do komunikasi nopo nga momusorou taralom-ralom pogulu i mooboros. Maya do laang diti, kaanu tokou do magalai mantad do kobolingkaangan soira monongkiboros do tulun suai. Lolobi po kopio nung i ponongkibaran dotokou nopo nga otogod. Soira nopo haro pioduhan id pibarasan, oponsol kopio do pakadada tokou om amu gumaab kototogod do tulun di ponongkibarasan. Mositi tokou nogi kopuriman do pioduhan di adadi maya pibarasan amu kaanu manalasai do kobolingkaangan di notoguang. Tumanud do ponoriukan, nung amu nopo tolibambanon o kototogod diti, milo iti do manahak bagas negatif kumaa tulun dii sondiri toi ko kumaa tulun posorili do suai (Sarifuddin,2015).

Sabaagi do pomolingkup, ogumu ahal di kopogowit kumaa kobolingkaangan doid komunikasi. Ahal nopo ngawi diti nga mantad dau sondii toi ko mantad nunu nopo i adadi id posorili do sosongulun diri i kaanu mogowit kumaa kobolingkaangan id komunikasi. Nga sundung pia do tirad dilo, kobolingkaangan komunikasi nopo diti nga milo do tolibambanon maya laang-laang di apatong. Koinsanai konflik di adadi nogi nga milo do tolibambanon maya kabaalan do sosongulun maya do konsep om prinsip kokomoi mogikakawo o ahal lolobi po kopio it haro pironitan miampai komunikasi. Komunikasi toi ko pibarasan nopo diti nga kitongungan tagayo montok poposuni piombolutan doid pialatan do tulun ngawi. Sundung pia do okon ko mogiompinai, nga kaanu o komunikasi diti do popogirot piisaan id pialatan do tulun di mogisusuai tinaru om koubasanan. Dadi, sosongulun nopo dii aiso komunikasi kumaa tulun suai nga apagon do popotilombus kopoposion diolo. Komunikasi berkesan nogi nga oponsol kopio id koposion dotokou mooi do maklumat di pinatahak amu koborulong do tulun suai. Dadi, mantad no dilo do komunikasi efektif om efisen nopo diti nga oponsol no kopio montok popoimbulai tulun toi ko tinimungan di kitoilaan, kikagaaban, kikotumbyaan om lolobi po kopio montok monolibamban digti kobolingkaangan do komunikasi.